کچھ لوگوں کی عادت ہوتی ہے کہ وہ ہر بات کھری اور صاف کرتے ہیں اور جو بھی ان کے دل میں ہوتا ہے وہ دوسروں سے کہہ دیتے ہیں، لیکن اکثر یہ عادت ان کو مہنگی بھی پڑجاتی ہے۔
ہر بات سامنے کہہ دینے میں کوئی مضائقہ نہیں ہے لیکن کچھ لوگ اس طرح کے رویے سے غصے میں آجاتے ہیں اور یوں چھوٹی بات کا بڑا بتنگڑ بن جاتا ہے۔
آج ہم آپ کو چند ایسی طریقے بتائیں گے جن کے ذریعے آپ دوسروں کی اس طرح اصلاح کرسکتے ہیں جس سے دوسرے لوگ ناراض بھی نہیں ہونگے اور ان تک بات بھی پہنچ جائے گی۔
٭ سمجھانے سے قبل تعریف کریں
اگرآپ کے بچوں کا رزلٹ اچھا نہیں آیا تو ان کو ڈانٹے کے بجائے ان کو اس طرح سمجھایا جائے کہ وہ برا نہ منائیں اور آپ کی بات بھی آرام سن لیں۔ مثال کے طور پر جب آپ ان کا رپورٹ کارڈ دیکھیں تو ان دسے ہرگز اس جملے کا استعمال نہیں کریں کہ 'آئندہ ایسا رزلٹ نہیں آنا چاہیئے' بلکہ ان سے کہیں کہ آپ نےامتحانوں میں بہت محنت کی ہے آپ پڑھائی پر محنت اسی طرح جاری رکھیں گے توآئندہ دیگر مضمون میں بھی آپ کے اچھے نمبر آئیں گے۔
٭ ذاتی مسئلہ نہ بنائیں
اگر دفتر میں کولیگ نے آپ کا کام وقت پر نہیں کرکے دیا تو اس بات کو ذاتی مسئلہ ہرگز نہیں بنائیں۔آپ اپنے کولیگ کو اس طرح سمجھا دیں کہ وہ آپ کی بات سے دکھی نہ ہو۔کوشش کریں کہ دفتر میں ہر کسی سے اسی طرح بات کریں جس سے دوسرا شخص دکھی نہ ہو۔
٭ مختصر اور واضح بات کریں
کوشش کریں کہ کسی سے بھی غیر واضح بات نہیں کی جائے کیونکہ اس طرح کی بات سے غلط فہمیاں ہوتی ہیں اور غیر ضروری بحث ہونا شروع ہوجاتی ہے۔لہذا کوشش کریں کہ کولیگ سمیت ہر شخص سے کسی بھی موضوع پر واضح بات کی جائے۔
٭ تحمل رکھیں
جب بھی آپ کسی شخص سے اس کا منفی کام پر بات چیت کرنے لگیں تو ہر قسم کے رویے کیلئے تیار رہیں اور خود کو ایسی صورتحال میں مثبت رکھیں اور غصہ کرنے سے گریز کریں۔
٭ مثال دے سمجھائیں
اگر آپ اپنے دوست، کولیگ یا بچوں کو کم وقت میں اچھی بات سمجھانا چاہتے ہیں تو ان کو مثال دے کر اپنی بات سمجھا سکتے ہیں۔ اس طرح دوسرے شخص کو بات بھی سمجھ آجائے گی اوروقت بھی کم ضائع ہوگا۔
٭ اپنا تجربہ بھی بیان کریں
جب بھی آپ کسی کی اصلاح کررہے ہوں تو اس دوران اپنے برے تجربوں کا ذکر ضرور کریں۔ دوسروں پر یہ بات ہرگز واضح نہیں کریں کہ آپ سب سے بہتر ہیں اور باقی لوگ آپ کے سامنے کچھ بھی نہیں ہیں۔ ایسا کرنا بہت غیر مناسب ہوتاہے۔
٭ اکیلے میں بات کریں
کوشش کریں جب آپ کسی کی کوئی بات درست کرنا چاہتے ہیں تو اکیلے میں جاکران سے گفتگو کریں۔ دوست، کولیگ اور دیگر لوگوں کے سامنے ان کو ہرگز نہیں ڈانٹیں اور نہ ہی اونچی آواز میں بات کریں۔
