ان کا کہنا ہے کہ بنگلہ دیشی ٹیلی ویژن چینلوں پر غیر ملکی ڈرامے دکھائے جا رہے ہیں جس کی وجہ سے ملکی فنکاروں کی مانگ میں کمی واقع ہو گئی ہے۔
بی بی سی بنگلہ کے نامہ نگار اکبر حسین کے مطابق فنکاروں نے مطالبہ کیا ہے کہ حکومت ان چینلوں کیخلاف کارروائی کرے اور بغیر قواعد و ضوابط کے دکھائے جانے والے پروگراموں پر پابندی عائد کی جائے۔
ان دنوں بنگلہ دیش میں 'سلطان سلیمان' نامی ایک ڈرامہ مقبولیت کی بلندیاں چھو رہا ہے اور جس وقت یہ ڈرامہ دکھایا جاتا ہے، ناظرین دوسرے چینلوں پر نشر کردہ پروگراموں کو نظر انداز کر دیتے ہیں۔
اس ڈرامے کی مقبولیت کے پیشِ نظر کئی دوسرے چینلوں نے بھی ترکی ڈرامے بنگالی زبان میں ڈب کر کے دکھانے شروع کر دیے ہیں۔
اکبر حسین کہتے ہیں کہ اس کے علاوہ فنکاروں نے یہ بھی مطالبہ کیا کہ بنگلہ دیشی چینلوں پر انڈین مواد کی بھرمار ہے جس کی وجہ سے مقامی فنکار متاثر ہو رہے ہیں۔
یاد رہے کہ پاکستان میں بھی ترکی ڈرامے خاصے مقبول رہے ہیں۔ خاص طور پر 'میرا سلطان' کو خاصی پذیرائی ملی تھی، ڈرامے کی مقبولیت کے باعث یہاں بھی ترک ڈراموں کیخلاف احتجاج کیا گیا تھا۔
بشکریہ:بی بی سی اردو
