ممبئی : بولی وڈ اداکارہ کرینہ کپور اپنے بیٹے تیمور علی خان کی پیدائش کے دو ماہ بعد ریمپ پر اپنے مخصوص انداز میں نظر آئيں۔

دو ماہ کے بچے کی والدہ اور  چھتیس سالہ اداکارہ نے ’الکیمی‘ نامی ڈیزائن کی نمائش کی۔

ریمپ پر کرینہ کو دیکھنے کے لیے بولی وڈ کی اہم شخصیات موجود تھیں اور انھوں نے کرینہ کپور خان کے لباس اور انداز دونوں کو خوب سراہا۔

 شو میں کرینہ نے ڈیزائنر انیتا ڈونگرے کے ملبوسات کی نمائش کی اور اس کے ساتھ ہی ممبئی میں جاری فیشن ویک اتوار کو اپنے اختتام کو پہنچا۔

اس سے قبل ایک پروگرام میں کرینہ کپور کی بہن اور اداکارہ کرشما کپور نے کہا تھا کہ کرینہ جو بھی پہنتی ہیں وہ ان پر بہت جچتا ہے۔

خیال رہے کہ کرینہ کپور جب حاملہ تھیں تو ان کی تصاویر بھی عوام میں دلچسپی کا باعث تھی۔

خبررساں ادارے آئی اے این ایس کے مطابق گذشتہ ماہ جب لیکمے کے لیے ان کے نام کا اعلان کیا گیا تھا تو کرینہ کپور نے کہا تھا کہ لیکمے کی نمائندگی کرنا ہمیشہ سے ان کے لیے خوش کن تجربہ رہا ہے۔