پاکستانی اداکارہ ماہرہ خان نے کہا ہے کہ ان کی پہلی بولی وڈ فلم 'رئیس' پاکستان میں جلد ہی ریلیز ہو گی ۔

بھارتی خبر رساں ایجنسی کے مطابق  انھوں نے ویڈیو کانفرنسنگ کے ذریعے اپنے خیالات کا اظہار کیا۔

ماہرہ نے کہا: ’یہ فلم پاکستان میں جلد ہی ریلیز ہو گی اور دنیا بھر کی طرح یہاں بھی لوگ اس کی ریلیز کا بے صبری سے انتظار کر رہے ہیں۔۔۔ '

ماہرہ خان نے یہ شکوہ بھی کہا کہ انھیں یہ امید تھی کہ شاہ رخ خان ان کے لیے بھی اپنے سگنیچر سٹائل میں بانھیں پھیلائيں گے اور ان کا دوپٹہ بھی ہوا میں لہرائيں گے لیکن ایسا نہ ہو سکا۔

فلم سے متعلق اپنے تجربات کے بارے میں انھوں نے کہا: ’فلم سائن کرنے کے بعد ہم ایک فوٹو شوٹ کر رہے تھے۔ مجھے پتہ چلا کہ شاہ رخ آئے ہیں۔ ہم دوڑتے ہوئے ان کے پاس پہنچے اور سلام کلام ہوا۔ انھوں نے کہا کہ سب ٹھیک ٹھاک رہے گا۔‘

ماہرہ  کا کہنا تھا کہ وہ شاہ رخ خان کے ساتھ کام کرنے کے بارے میں بہت پرجوش تھیں کیونکہ وہ ان کی مداح ہیں اور ان کی فلمیں دیکھ کر بڑی ہوئی ہیں۔ 'جب میں ممبئی آئی تو سوچا کم از کم میرا دوپٹہ تو اڑے گا اور شاہ رخ خان دوڑتے ہوئے میری جانب آئيں گے لیکن ایسا کچھ نہیں ہوا۔'

شاہ رخ خان جو وہاں موجود تھے انھوں نے حاضر جوابی سے کام لیتے ہوئے کہا: 'آپ چھوٹی ہیں۔۔۔ میں نے ایک گیت کے دوران آپ کو اٹھایا تو تھا۔'

پاکستان میں اب انڈین فلموں کی نمائش پر عائد عارضی پابندی ہٹائی جا چکی ہے ۔ تاحال فلم پاکستان کے علاوہ ہر جگہ  پچیس جنوری کو ریلیز ہوئی تھی اور اس نے ابھی تک  سو کروڑ سے زیادہ کا بزنس کر لیا ہے۔

واضح رہے کہ ٹیلی کانفرنسنگ  کے موقعے پر ان کے ساتھ اداکار شاہ رخ خان، نوازالدین صدیقی اور فلم ساز ریتیش سدھوانی بھی موجود تھے۔

Courtesy : BBC Urdu