کراچی : پاکستان کے سینسر بورڈ نے ملک میں شاہ رخ خان اور پاکستانی اداکارہ ماہرہ خان کی بولی وڈ فلم ’رئیس‘ کو نمائش کی اجازت دینے سے انکار کر دیا ہے۔

سینسر بورڈ کے ایک اہلکار نے نام ظاہر نہ کرنے کی شرط پر بی بی سی کو بتایا۔ فلم کو سرٹیفیکیٹ جاری نہ کرنے کی وجہ یہ ہے کہ فلم میں اسلام اور خصوصاً مسلمانوں کے ایک فرقے کو بدنام کیا گیا ہے۔

پاکستان میں فلم کے تقسیم کار ایورریڈی پکچرز نے بی بی سی اردو کو بتایا ہے کہ مرکزی سینسر بورڈ نے فلم کو سینسر سرٹیفیکیٹ جاری کرنے سے انکار کر دیا ہے۔

ان کا کہنا تھا کہ فلم میں مسلمانوں کو جرائم پیشہ اور دہشت گرد بنا کر پیش کیا گیا ہے۔

اہلکار کے مطابق فلم جمعے کو سینسر بورڈ کے سامنے پیش کی گئی تھی اور طویل غوروخوص کے بعد پیر کو اسے نمائش کی اجازت نہ دینے کا فیصلہ کیا گیا۔

خیال رہے کہ پاکستان میں حال ہی میں بھارتی فلموں کی نمائش کا سلسلہ حال ہی میں دوبارہ شروع ہوا ہے اور پابندی ہٹنے کے بعد اس وقت دو بھارتی فلمیں 'قابل' اور 'اے دل ہے مشکل' پاکستانی سنیماؤں میں دکھائی جا رہی ہیں۔

واضح رہے کہ گذشتہ سال ستمبر میں مقبوضہ  کشمیر میں واقع اُڑی کیمپ پر ہونے والے حملے کے دو ہفتے بعد انڈین موشن پکچرز ایسوسی ایشن نے پاکستانی فنکاروں کے بھارت میں کام کرنے پر پابندی عائد کرنے کی قرارداد منظور کی تھی۔

 جواب میں پاکستان میں سینیما مالکان نے اپنے طور پر بھارتی فلموں کی نمائش روک دی تھی،یہ خود ساختہ پابندی دسمبر میں اٹھا لی گئی ۔

Courtesy: BBC Urdu