ممبئی:بولی وڈ میں رشتے اور تعلقات آپ کی پلک جھپکنے سے پہلے بدل جاتے ہیں  ،شو بز کی اس چکا چوند دنیا میں  کچھ بھی مستقل نہیں رہتا ،اچھے دوست ایک دوسرے کے حریف اور  دشمن منٹوں میں دوست بن جاتے ہیں۔

انڈسٹری میں ساتھ کام کرنے والے اداکار ایک دوسرے کے اچھے دوست بن جاتے ہیں اور  یہ دوستی اکثر محبت میں تبدیل ہو جاتی ہے،لیکن بہت بار دیکھا گیا ہے کہ یہ محبت شادی تک نہیں پہنچ پاتی اور  اداکاروں کے درمیان اختلافات کی خبریں  میڈیا پر گردش کرنا شروع ہوجاتی ہیں۔

بولی وڈ ببل کے مطابق  انٹرویو کے دوران رانی سے جب سوال کیا گیا کہ ابھیشیک کی آپ کو اپنی شادی میں  نہ بلانے کی کیا وجہ تھی کہ جواب میں رانی نے کہا "سچ یہ ہے کہ اگر کوئی شخص آپ کو  اپنی شادی میں نہ بلائے تو  آپ کو احساس ہوجاتا ہے کہ آپ ا س کی زندگی میں کیا اہمیت رکھتے ہیں ،آپ اس دھوکے میں  رہتے کہ آپ کے درمیان دوستی کا رشتہ ہے ،لیکن یہ دوستی فلم کے سیٹ تک محدود رہتی ہے"۔

انہوں نے مزیدکہا کہ یہ میرے لیے کوئی معنی نہیں رکھتا کہ میرے ساتھی اداکاروں کے ساتھ میرا دوستی کا کوئی رشتہ نہیں ہے،اگر کوئی آپ کو اپنی شادی میں نہیں بلانا چاہتا تو یہ اس کی مرضی ہے میں اس میں کچھ نہیں کرسکتی،ہم سب اپنی زندگیوں میں آگے بڑھ جاتے ہیں صرف یادیں ساتھ رہ جاتی ہیں۔

واضح رہے کہ ابھیشیک اور رانی نے ایک ساتھ فلم'کبھی الوداع نہ کہنا'،'یووا'، 'بنٹی اور ببلی' اور 'بس اتنا سا خواب ہے'میں کام کیا ہے،فلم یووا کی شوٹنگ کے دوران یہ افواہیں گردش کررہی تھیں کہ دونوں کےدرمیان رشتے کی نوعیت دوستی سے کچھ زیادہ ہے ،بعد ازاں  دونوں کے درمیان علیحدگی ہوگئی،اور اب دونوں اداکار  اپنی شادی شدہ  زندگیوں میں بے حد خوش ہیں۔