بھارت میں کورونا وائرس کی بگڑتی صورتحال کو مدنظر رکھتے ہوئے کولکتہ کے ایڈن گارڈن کرکٹ اسٹیڈیم کو قرنطینہ مرکز میں تبدیل کردیا گیا ہے۔

غیرملکی میڈیا کے مطابق بھارتی ریاست مغربی بنگال کے دارالحکومت کولکتہ کے اسپتالوں میں رش کے باعث بھارت کے دوسرے اور دنیا کے تیسرے بڑے کرکٹ اسٹیڈیم ایڈن گارڈن کو قرنطینہ مرکز میں تبدیل کردیا گیا ہے جہاں کورونا سے متاثرہ پولیس اہلکاروں کو رکھا جائے گا۔

واضح رہے کہ بھارت میں اب تک کورونا وائرس کے مصدقہ کیسز کی تعداد 8 لاکھ 47 ہزار سے جبکہ اموات کی تعداد بھی 22 ہزار 600 سے تجاوز کرگئی ہے۔

صرف مغربی بنگال میں کورونا کے کیسز کی تعداد 27 ہزار اور ہلاکتیں 800 سے زائد ہوچکی ہیں جن میں سے 80 فیصد سے زائد کیسز اور اموات صرف کولکتہ میں ہوئی ہیں۔

حکام کے مطابق کولکتہ پولیس کے 550 اہلکار عالمی وباء کا شکار جبکہ 2 اہلکار ابدی نیند سوچکے ہیں۔