کورونا کے باعث بند تعلیمی سرگرمیاں بحال ہونے پر کیسز سامنے آئے تو سندھ حکومت نے تعلیمی ادارے کھولنے کا دوسرا مرحلہ مؤخر کردیا۔ جس پر وفاق اور سندھ حکومت آمنے سامنے آگئے۔

وفاقی وزیر تعلیم شفقت محمود نے سندھ کے فیصلے کی مخالفت کردی۔ ادھر پرائیویٹ اسکولز ایکشن کمیٹی نے وزیرتعلیم سندھ سعید غنی سے استعفے کا مطالبہ کردیا۔

وفاقی وزیر تعلیم شفقت محمود نے کہا اسکولز کھولنے کے شیڈول میں کوئی تبدیلی نہیں آئی۔ حتمی فیصلے کیلئے بائیس ستمبر کو این سی او سی کی میٹنگ ہوگی۔ اگر یہی صورتحال رہی تو چھٹی سے آٹھویں کی کلاسز شروع نہ کرنے کا کوئی جواز نہیں رہے گا۔

ادھر پرائیویٹ اسکولز ایکشن کمیٹی نے وزیرتعلیم سندھ سعید غنی سے استعفے کا مطالبہ کردیا ہے۔ چیئرمین پرائیویٹ اسکولز ایکشن کمیٹی پرویز ہارون نے بلاول بھٹو اور وزیراعلیٰ سندھ سے اپیل کی کہ وہ این سی او سی کے فیصلوں پر عمل درآمد کرائیں۔ چند اسکولز کی شکایات پر پورے تدریسی عمل کو بند نہ کریں۔