ہارڈس ویلجوئن پشاور کو ٹائٹل جتوانے کیلئے پرامید
جنوبی افریقہ اور پشاور زلمی کے فاسٹ بولر ہارڈس ویلجوئن پشاور زلمی کو پی ایس ایل فائیو کا ٹائٹل جتوانے کیلئے پرا مید ہیں۔
تفصیلات کے مطابق پاکستان سپر لیگ پلے آف مرحلے کیلئے پشاور زلمی میں شامل جنوبی افریقہ کے فاسٹ بولر ہارڈس ویلجوئن نے ایک انٹرویو میں کہا کہ وہ زلمی فیملی کا حصہ بن کر خوش ہیں اور پاکستانی کھلاڑیوں کے ساتھ اُن کا بہترین وقت گزر رہا ہے۔
ہارڈس ویلجوئن نے کہا کہ یاسر شاہ سے سب سے زیادہ دوستی ہوگئی ہے، شعیب ملک بھی بہترین ٹیم میٹ ہیں۔ اس کے علاوہ بھی تمام پاکستانی اور غیر ملکی کرکٹرز کے ساتھ اچھا وقت گزر رہا ہے۔
انہوں نے مزید کہا کہ دنیا بھر میں کوویڈ 19 کی صورتحال کے پیش نظر اب جہاں بھی کرکٹ ہو وہ کسی نعمت سے کم نہیں اور پاکستان میں کرکٹ کھیل کر اچھا محسوس ہورہا ہے۔
فاسٹ بولر نے کہا کہ پاکستان سپر لیگ پلے آف میچز میں شریک ہوکر خوشی ہورہی ہے، اب تک پریکٹس سیشز اور دونوں پریکٹس میچز بہت مددگار رہے اور وہ اپنی کارکردگی سے زلمی کو ٹائٹل جتوانا چاہتے ہیں۔
ویلجوئن نے مزید کہا کہ ڈیرن سیمی کی کمی محسوس ہورہی ہے لیکن ٹیم جیت کیلئے پرامید ہے۔
Comments are closed on this story.