آٹا سستا ہونے کے باوجود اسلام آباد میں روٹی اور نان کی قیمت کم نہ ہوسکی، نانبائیوں کا کہنا ہے کہ ایندھن بہت مہنگا ہے جس کی وجہ سے سستی روٹی فروخت کرنا ممکن نہیں ہے۔

وفاقی دارالحکومت اسلام آباد میں زیادہ تر جگہوں پر روٹی 25 روپے اور نان 30 روپے میں فروخت ہورہا ہے، نان بائیوں کا کہنا ہے کہ ان کے لئے روٹی کی قیمت میں کمی کرنا ممکن نہیں کیونکہ اخراجات بہت زیادہ ہیں، بجلی اور گیس کے بل ادا کرنا ہی مشکل ہیں

شہریوں کا کہنا ہے کہ آٹا کی قیمت میں نمایاں کمی ہوئی ہے اس لئے روٹی اور نان کی قیمت بھی کم ہونا چاہئیے، دو وقت کا کھانا مشکل ہوگیا ہے، غریب آدمی کہاں جائے، روٹی بنیادی ضرورت ہے جو سستی ہونی چاہیے۔

اسلام آباد کی ضلعی انتظامیہ نے روٹی کی قیمت 16 روپے جبکہ نان کی قیمت 20 روپے مقرر کی تھی لیکن اس پر اسلام آباد ہائی کورٹ کی طرف سے حکم امتناعی جاری کردیا گیا تھا۔