ہالی ووڈ کے 62 سالہ  مشہور زمانہ مزاحیہ اداکار روون اٹکنسن عرف مسٹر بین نے ایک انٹرویو کے دوران بتایا کہ مسٹر بین کی نئی سیریز پر کام ہورہا ہے، جس میں انہیں ایک بزرگ پنشنر کے روپ میں دکھایا جائے گا۔

ان کا کہنا تھاکہ مسٹر بین کو بڑھاپے کے روپ میں دکھانا بہت پرمزاح ہوگا اور دیکھنا ہوگا کہ ہم کس قسم کا مزاح اس کردار سے نکال سکتے ہیں، مگر یہ بات یقینی ہے کہ ایک بزرگ شخص کا کردار کافی مزاحیہ ہوگا۔

مسٹر بین کا کردار پہلی بار چھوٹی اسکرین پر 1990 میں جلوہ گر ہوا تھا جس کی متعدد اقساط 1995 تک نشر ہوئیں۔بعد میں یہ کردار دو فلموں میں بھی نظر آیا جن میں سے ایک 1997 کی بین : دی الٹی میٹ ڈیزاسٹر مووی جبکہ دوسری 2007 کی مسٹر بینز ہالی ڈے تھی، جبکہ اس پر ایک کارٹون شو اب بھی نشر ہوتا ہے۔

روون اٹکنسن  اب سنجیدہ کرداروں کو زیادہ توجہ  دیتے ہیں۔ تاہم ان کا کہنا تھا کہ وہ مسٹر بین کے کردار سے کبھی ریٹائر نہیں ہوں گے۔ان کا کہنا تھاکہ  میرا ایسا کوئی منصوبہ نہیں، میرا کسی بھی کردار کو الوداع کہنے کا ارادہ نہیں، مجھے لگتا ہے کہ میں اب بھی مسٹر بین کا کردار ادا کرسکتا ہوں، بس اس کی سمت کو بدلنا ہوگا۔