کپل شرما نے خودکشی کی کوشش کیوں کی؟
معروف بھارتی مزاح نگار کپل شرما نے انکشاف کیا ہے کہ انہوں نے سنیل گروور سے جھگڑے کے بعد خودکشی کی کوشش کی تھی۔ اپنی نئی فلم 'فرنگی' کی تشہیر کے سلسلے میں منعقدہ تقریب کے دوران کپل شرما نے میڈیا سے گفتگو کرتے ہوئے انکشاف کیا کہ سنیل گروور سے جھگڑے کے بعد میرے ٹی وی شو کی مقبولیت میں بھی کمی آگئی تھی اور میں ذہنی طورپر پریشان اور تنہا محسوس کرنے لگا تھا۔ ان کا کہنا تھا کہ اس ساری صورت حال نے انہیں ڈپریشن میں مبتلا کردیا تھا۔ کپل شرما نے بتایا کہ ان کے ایک دوست نے انہیں سمندر کنارے واقع اپارٹمنٹ میں منتقل ہونے کا مشورہ دیا تاکہ ذہنی سکون ملے۔ انہوں نے کہا کہ دوست کے مشورے پر عمل کرتے ہوئے میں وہاں رہنے بھی لگا لیکن میری ذہنی پریشانی کم ہونے کا نام ہی نہیں لے رہی تھی۔ اس دوران میں نے گھر کی بالکونی سے کود کر خودکشی کی بھی کوشش کی۔ کپل شرما کی دوسری فلم 'فرنگی' 10 نومبر کو ریلیز ہوگی۔ بشکریہ dnaindia
