آج ہم آپ کو پُر اسرار طور پر انتقال کر جانے والے مشہور بولی وڈ اداکاروں کے بارے میں بتائیں گے۔

٭ سری دیوی

سری دیوی کی اچانک موت نے نہ صرف فلم انڈسٹری کے لئے بلکہ پورے ہندوستان کو حیرت میں مبتلا کردیا تھا۔ سری دیوی اپنی بیٹی اور شوہر کے ساتھ دبئی میں ایک شادی میں شرکت کے لیے  موجود تھیں کہ ان کی اچانک موت کی خبر سامنے آگئی۔ابتدا میں میڈیا کے ذریعے پتہ چلا کہ انہیں دل کا دورہ پڑا تھا لیکن پوسٹ مارٹم رپورٹ کے مطابق ان کی موت باتھ ٹب میں ڈوبنے سے ہوئی۔

دبئی پولیس کی جانب سے ان کے شوہر بونی کپور سے پوچھ گچھ نے واقعہ کو مزید پراسرار بنا دیا اور ایسے میں ہندوستانی میڈیا نے غیر ذمہ داری کا مظاہرہ کرتے ہوئے سری دیوی کی موت سے متعلق خوب قیاس آرئیاں کیں۔

٭ دیویا بھارتی

نوے کی دہائی کی مشہور اداکارہ دیویا بھارتی محض21 سال کی عمر  میں اپارٹمنٹ کی پانچویں منزل سے گِر کر ہلاک ہو گئی تھیں۔ انہیں عمارت سے دھکا دیا گیا یا انہوں نے خود کشی کی یہ معمہ آج تک حل طلب ہے۔

٭ جیا خان

گجنی فیم اداکارہ جیا خان کی لاش ان کے بیڈ روم میں پنکھے سے لٹکی ہوئی ملی تھی۔ ابتدائی طور پر ان کی موت کو خود کشی قرار دے دیا گیا تھا  لیکن  ان کی والدہ نے یہ دعویٰ کیا کہ جیا نے اپنے بوائے فرینڈ سورج پنچولی کی وجہ سے خود کشی کی۔ خود کشی سے پہلے لکھے خط میں بھی جیا خان نے یہ بات واضح کی تھی۔

٭ گرو دَت

گرو دت نے کمرشل فلموں  سے زیادہ آرٹ  فلموں کو ترجیح دی اور ان کی زیادہ تر فلموں کا شمار کلاسک فلموں میں ہوتا ہے۔ ماضی کے اس مشہور اداکار کی لاش 10 اکتوبر 1964 کو ان کے اپارٹمنٹ سے ملی تھی۔ رپورٹ کے مطابق، ان کے موت کی وجہ الکوحل میں سلیپنگ پِلز ملا کر استعمال کرنا تھی۔

٭ پروین بابی

پروین 70 اور 80 کی دہائی میں بولی وڈ کی ایک گلیمریس اور مشہور اداکارہ تھیں۔کئی بلاک بسٹر فلمیں دینے والی پروین کی لاش ان کے اپارٹمنٹ میں ملی تھی۔ تاہم ان کی موت کی وجہ اب تک معلوم نہیں ہوسکی۔

٭ کُنال سنگھ

کُنال سنگھ کی لاش 2008 میں ممبئی میں ان کے فلیٹ میں پنکھے سے لٹکی ہوئی ملی تھی۔'دل ہی دل میں' اپنی ادکاری سے سب کے دل جیت لینے والی  کنال کی اچانک موت سب ہی کے لئے حیرانی کا باعث تھی۔ پولیس رپورٹ کے مطابق کنال نے اپنی کلائی کاٹ کر خود کشی کی تھی۔

٭ پرتیوشا بینرجی

بھارتی ٹیلی وثرن انڈسٹری کی مشہور اداکارہ  پریتوشا  2016 میں اپنے کیریئر کی اونچائیوں  پر تھیں کہ ان کی لاش اپارٹمنٹ میں پنکھے سے لٹکی ہوئی ملی تھی۔ ان کے والدین نے یہ دعویٰ کیا کہ پرتیوشا کے سابق بوائے فرینڈ نے انہیں یہ فیصلہ کرنے پر مجبور کیا تھا۔

٭ سلک سمیتھا

یہ 80 کی دہائی کی مشہور اداکارہ تھیں انہوں نے 450 سے زائد فلموں میں کام کیا۔ 1996 میں انہوں نے اپنی ایک دوست کو  اپنی پریشانیوں سے آگاہ کرنے کیلئے بلایا لیکن کچھ وجوہات کی بنا پر ان کی  دوست  اُس رات ان سے ملنے نہ جاسکیں اور اگلی صبح سلک کے اپارٹمنٹ سے ان کی لاش بر آمد ہوئی۔ بہت سے بہت لوگوں کا یہ دعویٰ ہے کہ انہوں نے ذہنی دباؤ اور پریشانیوں کے باعث خود کشی کی۔

٭ نفیسا جوزف

نفیسا انڈسٹری کی ایک معروف  ویڈیو جوکی(وی جے) تھیں۔  محض 26 سال کی عمر  میں محبت میں ناکامی کے باعث انہوں نے اپنی زندگی کو ختم کرلیا۔ نفیسا ایک مشہور بزنس مین گوتم خندوجا سے شادی کرنے والی تھیں۔  شادی سے کچھ عرصے پہلے انہیں معلوم ہوا کہ گوتم  ابھی تک شادی شدہ ہے،  لیکن گوتم کا کہنا تھا کہ وہ دو سال پہلے ہی اپنی پہلی بیوی سے طلاق لے چکے ہیں۔ نفیسا نے جب اس معاملے میں گوتم سے جواب مانگا   اور طلاق کے کاغذات دکھانے کا کہا تو انہو ں نے صاف انکار کردیا۔اس وقت کی پریس رپورٹ میں کہا گیا کہ  انہوں نے نفیسا کو بلیک میل کیاتھا۔