ترجمان دفتر خارجہ کا کہنا ہے کہ بات چیت کے تحت ایسی فلسطینی آزاد ریاست قائم کی جائے جس کا دارالحکومت القدس الشریف ہو۔

ترجمان دفتر خارجہ عائشہ فاروقی کا کہنا ہے کہ امریکاکی جانب سے مشرق وسطیٰ کےلئے امن منصوبہ کے اعلان کا ہم نے جائزہ لیا ہے۔پاکستان نے سلامتی کونسل اور جنرل اسمبلی کی قراردادوں کے مطابق دو ریاستی حل کی ہمیشہ حمایت کی ہے۔پاکستان مذاکرات اور بات چیت کے ذریعے فلسطین کے مسئلہ کے منصفانہ اور پائیدار حل کی حمایت کرتا ہے جس سے استصواب رائے سمیت فلسطینیوں کے جائز حقوق کی فراہمی یقینی ہو۔

ترجمان کے مطابق بین الاقوامی معیار اور 1967 سے قبل کی سرحدات کے مطابق قابل عمل، خود مختار اور ملحق سرحد رکھنے والی فلسطینی ریاست قائم کی جائے جس کا دارالحکومت القدس الشریف ہو۔