ویسٹ انڈیز سابق مایہ ناز فاسٹ بولر این بشپ کا کہنا ہے کہ پاکستان کے سپر اسٹار بلے باز بابر اعظم اور بھارتی کپتان ویرات کوہلی کی تکنیک کو دیکھ کر عظیم بلے باز سچن ٹنڈولکر کی یاد آنے لگتی ہے۔

سابق زمبابوین فاسٹ بولر پومی بینگوا کے ساتھ انسٹاگرام لائیو سیشن میں گفتگو کرتے ہوئے این بشپ کا کہنا تھا کہ مجھے اپنے کیریئر کے دوران بھارت کے عظیم بلے باز سچن ٹنڈولکر کو بولنگ کرنے کا موقع ملا، وہ تکنیکی طور پر سب سے بہتر تھے اور وہ سیدھا کھیلنے کی کوشش کرتے۔

سابق فاسٹ بولر نے مزید کہا کہ میں نے یہی بات بابر اعظم اور ویرات کوہلی کی بیٹنگ میں دیکھی ہے کہ وہ بھی سیدھے بلے سے کھیلتے ہیں۔

گزشتہ دو سالوں کے درمیان بابر اعظم اور ویرات کوہلی کے درمیان موازنہ کافی بڑھ گیا ہے کیونکہ بابر اعظم ٹی ٹوئنٹی میں اور ویرات کوہلی ون ڈے کرکٹ میں بلے بازوں کی فہرست میں ٹاپ پوزیشن پر براجمان ہیں۔

واضح رہے کہ بابر اعظم ٹیسٹ میں 45، ون ڈے 54 سے زائد اور ٹی ٹوئنٹی کرکٹ میں 50 سے زائد کی بیٹنگ اوسط رکھتے ہیں۔

دوسری جانب بھارتی کپتان ویرات کوہلی ٹیسٹ کرکٹ میں 53 سے زائد، ون ڈے کرکٹ میں 59 سے زائد جبکہ ٹی ٹوئنٹی کرکٹ میں بھی 50 سے زائد کی کیریئر اوسط رکھتے ہیں۔