وزیراعظم کےنمائندہ خصوصی برائے بین المذاہب ہم آہنگی مولانا طاہراشرفی نے کہا ہے کہ بیرون ملک مقیم پاکستانیوں کے مسائل حل کرنا حکومت کی اولین ترجیح ہے۔
پیر کو اسلام آباد میں ایک نیوز کانفرنس سے خطاب کرتے ہوئے انہوں نے کہا کہ وزیراعظم سعودی عرب کے اپنے آئندہ دورے کے دوران سعودی قیادت سے مشاورت کریں گے۔
مولانا طاہر اشرفی نے کہا کہ وزیراعظم سعودی عرب میں مقیم پاکستانی برادری سے بھی بات چیت کریں گےاور ان کے مسائل سعودی حکام کے ساتھ اٹھائیں گے۔
انہوں نےکہا کہ وزیراعظم نے آج مسلم ممالک کے نمائندوں کےساتھ اجلاس میں ناموس رسالت سے متعلق امور پر متفقہ بیانیہ اختیار کرنے کی ضرورت پر زور دیا۔
طاہر اشرفی نے کہا کہ فلسطین اور کشمیر کے معاملے پر پاکستان کا موقف نہایت واضح ہےاور پاکستان ان معاملات پر ہرگزکوئی سمجھوتہ نہیں کرے گا۔
