لاہور کی انسداد منشیات عدالت میں سابق وزیر قانون رانا ثناءاللہ کیخلاف منشیات سمگلنگ کیس کی سماعت میں ملزمان کی بریت کی درخواستوں پر دلاٸل کیلئے وکلا کو طلب کرلیا۔

انسداد منشیات عدالت لاہور کے جج شیخ نعیم نے سابق وزیر قانون رانا ثناءاللہ کیخلاف منشیات اسمگلنگ کیس کی سماعت کی۔

سماعت کے دوران رانا ثنا اللہ کے وکیل نے حاضری معافی کی درخواست جمع کراتے ہوئے موقف اختیار کیا کہ ان کے موکل تحریک عدم اعتماد کی وجہ سے اسلام آباد میں مصروف ہیں، تو حاضری سے استثنی دیا جائے۔

عدالت نے رانا ثنا اللہ کی حاضری معافی کی درخواست منظور کرتے ہوئے آئندہ سماعت پر وکلا کو ملزموں کی بریت کی درخواستوں پر دلائل کیلئے پابند کر دیا۔

اینٹی نارکوٹکس فورس (اے این ایف) کے وکیل نے نشاندہی کی کہ 2 سال سے فرد جرم عائد نہیں ہوئی تاہم عدالت نے قرار دیا کہ پہلے بریت کی درخواست پر کارروائی ہو جائے پھر فرد جرم عائد کی جائے گی۔

عدالت نے سابق وزیر قانون کیخلاف مقدمے پر کارروائی 2 اپریل تک ملتوی کر دی۔