لاہور: وزیراعلیٰ پنجاب حمزہ شہباز نے مون سون سیزن سے قبل نالوں کی صفائی کا حکم دیتے ہوئے کہا کہ موسم برسات میں کسی کے حیلے بہانے نہیں سنوں گا۔
آج نیوز کے مطابق وزیراعلیٰ پنجاب حمزہ شہباز کی زیرصدارت لاہور میں اجلاس منعقد ہوا جس میں نالوں کی صفائی کیلئے ہنگامی اقدامات اور لاہور میں پانی کی قلت دور کرنے کا فیصلہ کیا گیا۔
وزیراعلیٰ نے کہا کہ شہر کے تمام نالوں کی صفائی کیلئے ایکشن پلان تیار کیا جائے جسے ٹائم لائن کے ساتھ مرتب کیا جائے۔
ان کا کہناتھا کہ بارشوں سے قبل نالوں کی صفائی کا کام ہر صورت مکمل ہونا چاہیے۔
حمزہ شہباز نے کہا کہ عید کے بعد ایم ڈی واسا نالوں کی صفائی کے حوالے سے ویڈیوز کے ساتھ تفصیلی بریفنگ دیں۔
مزید کہا کہ یونین کونسل کی سطح پر نکاسی آب کا میکنزم تیار کیا جائے۔
وزیراعلیٰ نے متنبہ کیا کہ موسم برسات میں کسی کے حیلے بہانے نہیں سنوں گا.
واضح رہے کہ انہوں نے اجلاس کے دوران لاہور کے مختلف علاقوں میں پانی کی قلت دور کرنے کیلئے ہنگامی اقدامات کا بھی حکم دیا۔
