چارسدہ: پاکستان تحریک انصاف کے چیئرمین عمران خان نے کہا ہے کہ امریکیوں کی امپورٹڈ حکومت ہم پر مسلط کی گئی، ہم کسی صورت ان چوروں اور امریکیوں کے غلاموں کو قبول نہیں کریں گے۔

چارسدہ میں جلسے سے خطاب کرتے ہوئے عمران خان نے کہا کہ جب تک زندہ ہوں ان چوروں کیخلاف جہاد ختم نہیں کروں گا، پوری قوم کو تیار کررہا ہوں۔

انہوں نے کہا کہ اب جو کال دوں گا تیاری کر کے دوں گا، اب ہم ایک ایک چیز کی تیاری کریں گے۔

عمران خان نے کہا کہ سپریم کورٹ نے جب کہہ دیا تھا کہ احتجاج ہمارا جمہوری حق تھا، ہم نے اب سب دیکھ لیا ہے کدھر کیا رکاوٹ ہے، کون ظالم تھے۔

انہوں نے مزید کہا کہ سی سی پی او لاہور، آئی جی پنجاب، آئی جی اسلام آباد مجرم ہیں، ایک ایک کی تصویر میری آنکھوں کے سامنے ہے۔

پی ٹی آئی چیئرمین کا کہنا تھا کہ ہم تمہیں نہیں چھوڑیں گے، تمہارا وقت آئے گا۔