سابق وفاقی وزیر اور رہنما پاکستان تحریک انصاف (پی ٹی آئی) عمر ایوب نے خبردار کرتے ہوئے کہا کہ پاکستان میں گیس اور بجلی کا بہت بڑا بحران آنے والا ہے۔

آج نیوز کے پروگرام ’آج رانا مبشر کے ساتھ‘ میں گفتگو کرتے ہوئے عمر ایوب نے کہا کہ پاکستان اسٹیٹ آئل (پی ایس او) 650 ارب روپے کا مقروض ہو چکا ہے، لہٰذا مستقبل میں پیٹرولیم مصنوعات کی قیمتوں میں کمی کا کوئی امکان نہیں ہے۔

عمر ایوب نے کہا کہ آج بھی اگر اسمبلی توڑ دی جاتی ہے تو 90 دن کے اندر نئے الیکشن ہوں گے۔ انہوں نے کہا کہ امریکا پاکستان کا دشمن نہیں بلکہ بہت بڑا تجارتی پارٹنر ہے، وہاں پاکستانیوں کی کثیر تعداد قیام پزیر ہے۔

اس موقع پر صدر فاریکس ایسوسی ایشن آف پاکستان ملک بوستان کا کہنا تھا کہ اسحاق ڈار کے ٹارگٹ ممکن ہیں، ڈار کے آنے سے ملک کی اقتصادی صورتحال درست سمت میں گامزن ہوگی۔