سیلاب متاثرین کی امداد کی رئیل ٹائم مانیٹرنگ کیلئے تیار کئے گئے ڈیش بورڈ کی افتتاحی تقریب میں وزیراعظم شہباز شریف نے ڈیش بورڈ کی کارکردگی پر عدم اطمینان اظہار کرتے ہوئے افتتاح کرنے سے انکار کردیا۔

وزیراعظم نے کہا کہ کہ ڈیش بورڈ کی ورکنگ مزید بہتر بنانے کی ضرورت ہے۔

دورانِ تقریب وزیراعظم کو ڈیش بورڈ کی چیدہ چیدہ خصوصیات پر بریفنگ دی گئی، جس میں بتایا گیا کہ اس سے متاثرین کو ملنے والی امداد کے بارے میں معلومات تک رسائی ممکن ہوگی۔

بریفنگ میں بتایا گیا کہ سیلاب متاثرین کیلئے دئے گئے فنڈز کی تفصیلات ڈیش بورڈ پر دستیاب ہوں گی، ڈیش بورڈ کے ذریعے قدرتی آفات سے نمٹنے کیلئے مربوط کاوشیں ممکن ہوسکیں گی۔

تاہم، وزیراعظم سیلاب متاثرین کیلئے بنائے گئےڈیش بورڈ کی تیاریوں سے ناخوش نظر آئے۔

وزیراعظم نے کہا کہ ڈیش بورڈ پر رئیل ٹائم انفارمیشن اپڈیٹ کی جائے، یہ ایسا ڈیش بورڈ نہیں ہے جو قوم کو درکار ہے، ڈیش بورڈ جس معیارکا ہونا چاہئے یہ ویسا نہیں۔

وزیراعظم نے کہا کہ رضائیاں، پینے کا پانی کہاں جارہا ہے، اس کی تفصیل کہاں ہے؟جس پر وفاقی وزیر امین الحق نے کہا کہ معیار کو بہتر کرتے ہیں۔

وزیراعظم نے کہا کہ میں کلاؤڈ برسٹ کے امکانات کا پوچھ رہا ہوں اس کا جواب ہی نہیں ہے ان کےپاس، امین الحق صاحب اور کتنا ٹائم چاہئے آپ کو؟

امین الحق نے کہا کہ میری گزارش تھی آپ اس کا افتتاح کردیں ہم اس کو بہتر کرلیں گے۔