ایشین کرکٹ کونسل کے صدرجے شاہ کے ایشیا کپ کی پاکستان سے منتقلی کے بیان پرپاکستان کرکٹ بورڈ (پی سی بی) کا ردعمل سامنے آگیا۔
ترجمان پی سی بی کا کہنا ہے کہ جے شاہ کے بیان پر حیرت اور مایوسی ہوئی، بیان اے سی سی یا ہم سے مشاورت کے بغیر دیا گیا، ان کا پاکستان سے ایونٹ منتقلی کا بیان یکطرفہ ہے،
ترجمان نے مزید کہا کہ ایونٹ کی منتقلی کا بیان اے سی سی اور آئی سی سی کو تقسیم کرنے کے مترادف ہے، بیان سے بھارت میں آئی سی سی ایونٹس میں پاکستان کی شرکت پر اثرات مرتب ہوسکتے ہیں۔
پی سی بی کے مطابق جے شاہ کی سربراہی میں ہونے والے اجلاس میں ہی ایشیا کپ کی میزبانی پاکستان کو سونپی گئی تھی، تاحال جے شاہ کے بیان پر ایشین کرکٹ کونسل سے کوئی وضاحت موصول نہیں ہوئی،
پی سی بی نے اس اہم اور حساس معاملے پر ایشین کرکٹ کونسل کا ہنگامی اجلاس بلانے کی درخواست کی ہے۔
دوسری جانب ایشیا کپ کے لئے بھارتی ٹیم کے پاکستان نہ آنے کے معاملے پرپاکستان کرکٹ بورڈ (پی سی بی) نے ایشین کرکٹ کونسل کواحتجاجی خط لکھ دیا۔
پی سی بی نے خط میں لکھا ہے کہ اے سی سی کے صدرجے شاہ سے وضاحت طلب کی جائے کہ انہوں نے تنہا ایشیا کپ کو نیوٹرل وینیوپرمنتقل کرنے کا بیان کیوں دیا، اگراکیلے ہی فیصلے کرنے ہیں تو پاکستان کونسل سے علیحدگی اختیارکرسکتا ہے۔
خط میں یہ بھی کہا گیا ہے کہ پاکستان آئندہ سال بھارت میں ہونے والے ورلڈ کپ کا بائیکاٹ بھی کرسکتا ہے۔
