الیکشن کمیشن نے بلوچستان میں مقامی حکومتوں کیلئے مخصوص نشستوں کے انتخابی شیڈول کا اعلان کردیا۔

الیکشن کمیشن کے مطابق بلوچستان کے 32 اضلاع کی تمام یونین کونسلوں، میونسپل کارپوریشن اور میونسپل کمیٹیوں میں پولنگ 14 دسمبر کو ہوگی۔

جبکہ ضلع کوئٹہ، لسبیلہ، حب اور میونسپل کمیٹی حرمزئی ضلع پشین میں پولنگ نہیں ہوگی۔

اعلامیے میں کہا گیا ہے کہ مخصوص نشستوں(خواتین، مزدور، کسان اور غیر مسلم ) کے انتخابات کے شیڈول جاری کیا گیا ہے، امیدواروں سے کاغذات نامزدگی 7 سے 9 نومبر تک وصول کیے جائیں گے۔

الیکشن کمیشن نوٹی فکیشن میں مزید کہا گیا ہے کہ امیدواروں کی ابتدائی فہرست 10 نومبر کو جاری ہوگی جبکہ کاغذات نامزدگی کی جانچ پڑتال 11 سے 14 نومبر تک کی جائے گی۔

نوٹی فکیشن میں کہا گیا ہے کہ کاغذات نامزدگی کے منظور یا مسترد کیے جانے کے خلاف اپیلیں 15 سے 17 نومبر تک داخل کی جاسکیں گی جبکہ امیدواروں کو انتخابی نشان اور حتمی فہرست 25 نومبر کو جاری ہوگی۔