پی ٹی آئی رہنماؤں وکارکنان کے گھروں پر چھاپہ اور حراساں کرنے کے خلاف پاکستان تحریک انصاف کے رہنما خرم نواز نے سپریم کورٹ میں حکومت کے خلاف توہین عدالت کی درخواست دائر کردی۔

سپریم کورٹ میں دائر درخواست میں کہا گیاکہ 25مئی کو سپریم کورٹ نے گھروں پر چھاپے مارنے سے روکا تھا، سیاسی کارکنوں اور رہنماؤں کو حراساں نہ کرنے کا حکم دیا تھا تاہم پولیس اورایف سی نے گھر پر چھاپا مارا اور فیملی کو حراساں کیا۔

درخواست میں خرم نواز نے کہا کہ ان کے خلاف مقدمہ یا کوئی الزام نہیں، اس کے باوجود کنٹینر لگا کر آزادانہ نقل و حرکت میں رکاوٹ ڈالی گئی۔

درخواست میں مزید کہا گیا ہے کہ تحریک انصاف ایچ نائن اور جی نائن کے علاقہ میں پرامن احتجاج کرنا چاہتی ہے مگر سیکرٹری داخلہ عدالتی احکامات کو ملحوظ خاطر نہیں لا رہے۔

درخواست میں عدالت عظمیٰ سے وفاقی سیکرٹری داخلہ، آئی جی اور ایس ایس پی اسلام آباد کے خلاف توہین عدالت کی کارروائی کرنے کی استدعا کی گئی۔