ملک کے بالائی علاقوں میں ہونے والی برفباری نے سردی کی شدت میں اضافہ کردیا ہے جبکہ کئی مقامات پر برفباری کے باعث سڑکیں بند ہوگئیں ہیں۔
خیبرپختونخوا، آزاد کشمیر اور گلگت بلتستان کے فلک پوش پہاڑوں نے برف کی چادر اوڑھ لی ہے۔
بالاکوٹ و گردونواح میں بارش اور بالائی پہاڑوں پر برفباری کے باعث بابو سر ٹاپ، ناران ، جھیل سیف الملوک اور ملحقہ مقامات پر8 انچ تک برفباری ریکارڈ کی گئی ہے۔ برفباری کے سبب شاہراہ کاغان ناران سے آگے ٹریفک کے لئے بند کردی گئی۔
مزید پڑھیں: شاہراہ کاغان کو برفباری کے باعث ناران سے آگے بند کردیا
آزاد کشمیر کے بالائی علاقوں میں برف باری اور میدانی علاقوں میں بارش کے باعث سردی کی شدت میں اضافہ ہوگیا، مکڑا پہاڑ، پیر چناسی، جہلم ویلی، وادی لیپہ اور وادی نیلم کی پہاڑوں نے برف کی چادر اوڑھ لی ہے۔
گلگت بلتستان میں بھی برف باری سے عوام کی مشکلات بڑھ گئی ہیں جبکہ بالائی علاقوں میں درجہ حرارت نقظہ انجماد سے نیچے گرنے سے عوام کو ایندھن کے حصول میں بھی مشکلات درپیش ہیں۔
