حکومت نے توانائی کی بچت کیلئے قومی ہنگامی پلان تیار کر لیا، جو حتمی منظوری کے لئے کابینہ کے آئندہ اجلاس میں پیش کیا جائے گا۔

وزیراعظم شہباز شریف کی زیرِ صدارت معاشی بحالی اور توانائی کی قلت کے خاتمے کے لئے اجلاس ہوا۔

اجلاس میں بتایا گیا کہ توانائی کی بچت کا قومی ہنگامی پلان تیار کرلیا گیا ہے جس سے امپورٹ بل میں نمایاں اور واضح کمی ہوگی۔

اجلاس میں غیرمعمولی صورتِ حال میں غیرمعمولی اقدامات کا فیصلہ کیا گیا۔ ایمرجنسی بچت پلان حتمی منظوری کے لئے کابینہ کے آئندہ اجلاس میں پیش کیا جائے گا۔

تمام وزراء اعلیٰ کو بھی کابینہ کے آئندہ اجلاس میں مدعو کیا جائے گا۔ انرجی بچت پلان پر صوبوں کے ساتھ مل کر عمل درآمد ہوگا۔

اجلاس میں بجلی چوروں کے خلاف کریک ڈاؤن کا بھی فیصلہ کیا گیا، نجی اور سرکاری عمارتوں کو شمسی توانائی پر منتقل کرنا بھی پلان کا حصہ ہے۔

ہنگامی توانائی بچت پلان کا مقصد عوام اور معیشت پر دباؤ کم کرنا ہے کیونکہ عالمی منڈی میں تیل سمیت ایندھن کی قیمت میں مسلسل اضافہ ہو رہا ہے۔

پاکستان کا امپورٹ بل 29 بلین ڈالر سالانہ ہے۔ روپے میں یہ رقم 6 کھرب روپے سے زیادہ ہے۔ توانائی بچت پلان کے نتیجے میں 1.163 بلین ڈالر سالانہ کی بچت ہوگی جو پاکستانی روپے میں 262 ارب روپے سے زائد رقم بنتی ہے۔

اجلاس میں کہا گیا کہ غیرمعمولی حالات کا مقابلہ کرنے کے لئے غیرمعمولی اقدامات ناگزیر ہیں جس میں ہر پاکستانی کو اپنا کردار ادا کرنا پڑے گا۔

اس موقع پر وزیراعظم نے کہا کہ توانائی کی بچت پاکستان کی بقاء کا مسئلہ ہے۔