اسلام آباد ہائی کورٹ نے وفاقی دارالحکومت میں بلدیاتی انتخابات سے متعلق تفصیلی فیصلہ جاری کردیا ہے۔

عدالت کی جانب سے11 صفحات پر مشتمل تفصیلی فیصلہ جسٹس ارباب محمد طاہر نے جاری کیا، جس کے مطابق الیکشن کمیشن کو شیڈول کے مطابق 31 دسمبر کو الیکشن کرانے کا حکم ہے۔

اسلام آباد ہائی کورٹ نے صدر مملکت کی طرف سے بل پر دستخط نہ کرنے کو بنیاد بنایا۔ عدالتی فیصلے کے مطابق الیکشن کمیشن نے اپنے فیصلے میں کہا کہ بل صدر کو بھیج دیا گیا ہے۔

مزید کہا کہ فیڈریشن اور نہ ہی الیکشن کمیشن اپنے ریکارڈ سے ظاہر کرسکے کہ صدر کی طرف سے بل کی منظوری دے دی گئی ہے اورالیکشن کمیشن نے مجوزہ قانون پر انحصار کیا۔

اسلام آباد ہائی کورٹ کے فیصلے میں کہا گیا ہے کہ الیکشن کمیشن موجود قانون پرعملدرآمد کرنے کی پابند ہے۔