اسلام آباد ہائیکورٹ نے توشہ خانہ کیس میں چیئرمین پی ٹی آئی عمران خان کی نااہلی کے خلاف کیس میں پی ٹی آئی کی درخواست پر سماعت 25 جنوری تک ملتوی کردی، چیف جسٹس عامر فاروق نے کہا کہ کیا ایسا ہوتا ہے کہ ایک ہی نوٹس کو کئی عدالتوں میں چیلنج کر دیا جائے؟

چیف جسٹس اسلام آباد ہائیکورٹ جسٹس عامر فاروق نے توشہ خانہ کیس میں نااہلی کے الیکشن کمیشن کے فیصلے کے خلاف عمران خان کی درخواست پر سماعت کی۔

سماعت کے دوران پی ٹی آئی کے معاون وکیل بیرسٹر گوہر نے عدالت کو بتایا کہ بیرسٹر علی ظفر لاہور ہائیکورٹ میں مصروف ہیں، سماعت ملتوی کی جائے۔

چیف جسٹس اسلام آبادہائیکورٹ نے کہا کہ ایسا ہوتا ہے کہ ایک ہی نوٹس کو کئی عدالتوں میں چیلنج کر دیا جائے؟ جس پر وکیل نے کہا کہ اس معاملے پر بیرسٹر علی ظفر ہی جواب دیں گے، عدالت سے استدعا ہے کہ آئندہ ہفتے کی کوئی تاریخ دے دیں۔

چیف جسٹس عامر فاروق نے مسکراتے ہوئے وکیل سے مکالمہ کرتے ہوئے کہا کہ آئندہ سماعت پر کیا کوئی معجزہ ہو جائے گا؟ یہ اچھی چیز نہیں اگر ہم پڑھے لکھے لوگ بھی ایسا کام کریں۔

عدالت نے پی ٹی آئی کے وکیل کی استدعا منظور کرتے ہوئے سماعت 25 جنوری تک ملتوی کر دی۔