حکومتی اتحاد نے قومی اسمبلی کی نشستوں پر ضمنی انتخابات نہ لڑنے کا فیصلہ کرلیا۔
وفاقی وزیر اطلاعات و نشریات مریم اورنگزیب کا ایک بیان میں کہنا ہے کہ فسادی جماعت ضمنی الیکشن لڑے اور اسمبلی میں آ جائے، ایک جماعت استعفوں کی منظوری اور کبھی استعفے منظور نہ کرنے کے لئے عدالتوں میں جاتی ہے۔
پی ٹی آئی پر تنقید کرتے ہوئے مریم اورنگزیب نے کہا کہ الیکشن لڑنا تھا، ایوان میں ہی آنا تھا تو اسمبلیاں کیوں توڑیں؟ استعفے کیوں دیئے تھے۔
لیگی رہنما نے کہا کہ پی ٹی آئی چکرا چکی ہے کیا کرے، عدالت جائے، اسمبلی یا الیکشن میں جائے، البتہ ملک کو کسی ایک شخص کے انتشار کی بھینٹ نہیں چڑھنے دیں گے۔
واضح رہے کہ پی ڈی ٰایم پہلے ہی قومی اسمبلی کے ضمنی انتخابات میں حصہ نہ لینے کا فیصلہ کرچکی تھی جب کہ ن لیگ نے پیپلز پارٹی اور ایم کیو ایم سے بھی الیکشن نہ لڑنے کی درخواست کی تھی۔
