اونٹ کو صحرائی جہاز کہا جاتا ہے لیکن سوشل میڈیا پر اونٹوں کے ریوڑ کی ندی پار کرنے کی دلچسپ ویڈیو اسے پانی کا جانوربھی ثابت کرتی دکھائی دے رہی ہے۔

یہ وائرل ویڈیو سعودی عرب کی ہے جہاں اونٹوں کا ایک ریوڑ القصیم کے علاقے کے مغرب میں واقع العقلان کے قریب واقع موسلا دھار بارش کے بعد ندی عبور کر رہا ہے۔

شدید بارش کی وجہ سے القصیم میں الفویلق کے شمال میں شعیب ابونبطہ سمیت خطے میں بہت سی چٹانوں سے پانی بہنے کے باعث ندی کی صورت اختیار کرچکا ہے۔

اونٹوں کی پانی میں چہل قدمی کا دلچسپ انداز دیکھنے والوں کو خاصا محظوظ کررہا ہے۔

ماہرموسمیات محقق عبدالعزیزالحسینی کے مطابق آئندہ 36 گھنٹوں کے دوران بدھ سے جمعرات کی دوپہر تک بارش ہوگی جو اس سیزن کی 16 ویں بارش ہوگی۔

الحسینی نے اپنی ٹویٹ میں مزید کہا کہ ابر آلود بادل القصیم کے اضلاع حفر الباطن، الصمان سے منتقل ہونے کی توقع ہے۔متوقع بارشیں ہلکی سے درمیانی اوربعض اوقات بھاری ہوں گی جبکہ گرد آلود ہواؤں کے درمیان اولے بھی پڑسکتے ہیں۔

القصیم کے علاوہ سعودی دارالحکومت ریاض میں بھی تیزہواؤں کے ساتھ بارش ہوئی ہے۔