آرمی چیف سید عاصم منیر نے کہا ہے کہ ملکی سالمیت کو یقینی بنانے کے لئے کسی بھی خطرے کو ناکام بنانے کے لئے ہمہ وقت تیار ہیں۔
پاک فوج کے شعبہ تعلقات عامہ (آئی ایس پی آر) کے مطابق آرمی چیف جنرل عاصم منیر نے باجوڑ میں پاک افغان سرحد پر اگلے مورچوں کا دورہ کیا اور سرحد پر تعینات فوجی جوانوں کے ساتھ عید منائی۔
آئی ایس پی آر کے مطابق آرمی چیف نے افسروں اور جوانوں کے ساتھ عید کی نماز ادا کی اور ان کے بلند حوصلے کو سراہا۔
سربراہ پاک فوج نے کہا کہ پاک فوج سرحدوں کے دفاع کے لئے پرعزم ہے اور افواجِ پاکستان ملکی سالمیت کو یقینی بنانے کے لئے کسی بھی خطرے کو ناکام بنانے کے لئے ہمہ وقت تیار ہیں۔
جنرل آصف منیر نے مزید کہا کہ محافظینِ پاکستان دشوار راستوں، سخت موسمی حالات اور اپنے پیاروں سے دور ہونے کے باوجود، اپنے فرائض کو مقدم رکھتے ہیں کیونکہ سرحدوں کی حفاظت سے زیادہ مقدس کچھ نہیں ہے۔
آرمی چیف نے شہداء کو زبردست خراجِ تحسین پیش کرتے ہوئے زور دیا کہ عید کے دن ہمیں مادر وطن کے دفاع اور دہشت گردی کی لعنت کے خاتمے کے لیے اپنی جانوں کا نذرانہ پیش کرنے والوں کو ہرگز فراموش نہیں کرنا چاہیئے۔
پاک فوج کے سپہ سالار نے خصوصی طور پر شُہداء کے اہل خانہ کے لئے نیک خواہشات کا اظہار کیا۔
آرمی چیف جنرل عاصم منیر نے جوانوں اور آفیسرز کی آپریشنل تیاری اور مستعدی کو بھی سراہا۔
