بچپن کی دلچسپ ترین کہانی بہت جلد بڑی اسکرین پر سامعین کو مسحور کردے گی، عمرو عیار کی تخیلاتی کہانی پر مشتمل فکشن فلم’عمرو عیار: اے نیو بگننگ’ کا ٹیزر جاری کردیاگیا ہے۔

اس فلم میں عثمان مختار،صنم سعید، فرحان طاہر اور محب مرزا مرکزی کردار اداکررہے ہیں جبکہ اسکے ہدایت کار اظفر جعفری کہانی نویس عاطف صدیق ہیں۔

عمرو عیار کا دلچسپ ناول اور اس کا جادو بھرا سفر نیند سے قبل سنائی جانے والی وہ لازمی داستان ہے جسے 90 کی دہائی کے بچے اب بھی یاد کرتے ہیں۔ پی ٹی وی کی یادگار فکشن سیریز’ عینک والا جن ’کو یہ اعزاز حاصل ہے کہ اس کی چند اقساط میں عمرو عیار کو دکھایا گیا تھا۔

گزشتہ ہفتے جاری کیے گئے کے ٹیزر میں اداکار محب مرزا کو ایک تخیلاتی کردار میں ایک دشمن کے منہ پر زور دار مکا رسید کرتے ہوئے دکھایاگیا ہے، فلم کے ٹیزر سے اندازلگایا جاسکتا ہے کہ اس میں بصری اثرات کاشاندار استعمال کیا گیا ہے۔

فلم کی خاص بات یہ ہے کہ اس کی کاسٹ میں ہالی ووڈ کی مشہور ترین فلم ’آئرن مین ’ میں اداکاری کے جوہر دکھانے والے فرحان طاہر بھی موجود ہیں جبکہ دیگر کاسٹ میں عدنان صدیقی،ثنا ، علی کاظمی، منظر صہبائی، سیمی راحیل اور دیگرشامل ہیں ۔

فلم سازوں نے نومبر2021 میں اپنے اس منصوبے کے آغاز کا اعلان کیا تھا لیکن بعد میں اس میں تاخیر ہوئی۔ اب آخر کار ایک طویل انتظار کے بعد شائقین اس فلم کی ریلیز کی توقع کر رہے ہیں ۔