مقبوضہ کشمیر میں بھارتی فوج کے سرچ آپریشن کے دوران دھماکے کے نتیجے میں پانچ فوجی ہلاک ہوگئے۔

بھارتی میڈیا کے مطابق فوج نے مقبوضہ کشمیر کے ضلع راجوری کے علاقے میں سرچ آپریشن کیا اس دوران دھماکہ ہوا جس میں پانچ بھارتی فوجی ہلاک اور ایک زخمی ہوگیا۔

بھارتی میڈیا کا کہنا ہے کہ انڈین فورسز راجوری میں سرچ آپریشن کے دوران ایک غار میں چھپے عسکریت پسندوں کے خلاف کارروائی کررہی تھی۔ غار میں پناہ لینے والے عسکریت پسندوں پر بھارتی فوجیوں کو نشانہ بنانے کا الزام تھا۔

بھارتی فوج نے دعویٰ کیا کہ عسکریت پسندوں نے فوجیوں کو دیکھتے ہی اہلکاروں پر بارودی مواد پھینکا جس سے چھاپہ مار ٹیم منتشر ہوگئی اور فوجی مارے گئے۔

بھارتی فوج کے ترجمان نے بتایا کہ اس غار میں اُن دہشت گردوں نے پناہ لے رکھی تھی جو 20 اپریل کو ضلع پونچھ میں فوج کے ایک ٹرک پر حملہ کرکے 5 اہلکاروں کو قتل کرنے کے بعد فوجی اسلحہ لے کر فرار ہوگئے تھے۔