قومی کرکٹ ٹیم کے فاسٹ بولر اور مشیر برائے کھیل پنجاب وہاب ریاض کا کہنا ہے کہ ایشیا کپ کے لیے ہائبرڈ ماڈل پر عمل ہونے میں کوئی برائی نہیں ہے، پاک بھارت کھیلوں کے معاملے میں حکومتوں کا کردار زیادہ اہم ہوتا ہے۔
لاہور میں ڈپٹی کمشنر رافیعہ حیدر اور ڈی جی اسپورٹس پنجاب ڈاکٹر آصف طفیل کے ہمراہ پریس کانفرنس کرتے ہوئے وہاب ریاض نے کہا کہ ایشیا کپ کا بڑا ایشو بنا دیا گیا ہے، پاکستان میں میچز ہونے چاہئیں یہ اچھی چیز ہے، پاکستان میں سب بڑی ٹیمیں آچکی ہیں، ہائبرڈ ماڈل کے تحت ایشیا کپ ہو جائے تو اچھی بات ہے۔
انہوں نے کہا کہ پی سی بی نے ایشیا کپ کے لیے جو ہائبرڈ ماڈل تجویز کیا ہے موجودہ حالات میں اس سے بہتر کوئی آپشن نہیں، پاکستانی ٹیم کو ہوم گراؤنڈ پر بھی ون ڈے میچز درکار ہیں، نیوٹرل مقام پر بھی میچز سے گرین شرٹس کو ورلڈ کپ کی تیاری میں مدد ملے گی۔
انہوں نے کہا کہ سابق ٹیسٹ کرکٹرز کو فارغ کرکے ڈیٹا بیس سلیکشن کمیٹی پر ملا جلا ردعمل دیتے ہوئے کہا کہ میدان میں پرفارمنس کے ساتھ ڈیٹا بیس معاملات سے زیادہ واضح تصویر سامنے آسکتی ہے۔ ابھی اس پر مزید کچھ نہیں کہا جاسکتا، اس پر کامیابی کیلئے نئی سلیکشن کمیٹی کے لئے نیک خواہشات ہیں۔
واضح رہے کہ ایشیاکپ کے حوالے سے بھارت نے پاکستان کرکٹ بورڈ (پی سی بی) کے ہائبرڈ ماڈل کو تسلیم کرنے کیلئے رضامندی ظاہر کرتے ہوئے شرط رکھی ہے کہ پاکستان کی ٹیم ہندوستان میں شیڈول ورلڈکپ کھیلنے کیلئے تحریری یقین دہانی کرانی ہوگی۔
ہائبرڈ ماڈل کے تحت بھارت ایشیاکپ کے مقابلے نیوٹرل وینیو پر کھیلے گا تاہم میزبان ملک سری لنکا یا متحدہ عرب امارات ہوسکتے ہیں۔
