ماڈل ٹاؤن کچہری لاہور میں آتشزدگی کا واقعہ پیش آیا ہے جس سے 40 سے زائد وکلاء کے چیمبرز جل کر خاکستر ہوگئے جبکہ وکلاء نے واقعے کی تحقیقات اور نقصان کے ازالے کا مطالبہ کر دیا۔

ماڈل ٹاؤن کچہری لاہور میں نماز فجر کے وقت پل کے نیچے واقع وکلاء کے چیمبرز میں اچانک آگ بھڑک اٹھی، آگ نے دیکھتے ہی دیکھتے پل کے نیچے واقع 40 کے قریب دفاتر کو اپنی لپیٹ میں لے لیا۔

لوہے اور فائیبر شیٹ سے بنے دفاتر میں لگی آگ کی زد میں لاکھوں روپے کا سامان اور ضروری کاغذات جل کر راکھ کا ڈھیر بن گئے۔

ریسکیو نے اطلاع ملتے ہی فوری طور پر آگ پر قابو پایا تاہم آتشزدگی کی وجہ سے کوئی جانی نقصان نہیں ہوا۔

وکلاء کا کہنا ہے کہ اس واقعے کی انتظامیہ آگ لگنے کے واقعے کی تحقیقات اور ان کے نقصان کا ازالہ کیا جائے۔

وکلاء اور ان دفاتر میں کام کرنے والے افراد راکھ میں سے اپنا قیمتی سامان ڈھونڈتے رہے۔

ریسکیو ذرائع کا کہنا ہے کہ آگ لگنے کی وجوہات کا تعین نہیں ہو سکا، فائبر، کاغذ اور لکڑی کا فرنیچر ہونے کی وجہ سے آگ تیزی سے پھیلی۔