تحریک انصاف کے سربراہ کی توشہ خانہ ریفرنس میں حفاظتی ضمانت کی درخواست سماعت کیلئے مقرر ہوگئی جبکہ قومی احتساب بیورو راولپنڈی نے چئیرمین پی ٹی آئی کو 26 جون کو طلب کیا ہے۔

چیئرمین پی ٹی آئی نے توشہ خانہ ریفرنس میں حفاظتی ضمانت کیلئے لاہور ہائیکورٹ سے رجوع کیا۔ عدالت نے حفاظتی ضمانت کی درخواست سماعت کیلئے مقرر کرلی۔

جسٹس علی باقر نجفی کی سربراہی میں دو رکنی بینچ 26 جون کو سماعت کرے گا۔ چیئرمین تحریک انصاف کے وکیل انتظار حسین پنجوتہ دلائل دیں گے۔

سربراہ پی ٹی آئی نے اپنی درخواست میں مؤقف اختیار کیا کہ تحقیقات میں شامل ہونا چاہتے ہیں، پولیس کی جانب سے گرفتاری کا خدشہ ہے، عدالت سے استدعا ہے کہ حفاظتی ضمانت منظور کی جائے۔

چیئرمین پی ٹی آئی، بشریٰ بی بی طلب

قومی احتساب بیورو میں توشہ خانہ کے تحائف سے متعلق تحقیقات جاری ہیں۔ نیب راولپنڈی نے چئیرمین پی ٹی آئی اور ان کی اہلیہ بشریٰ بی بی کو پھر طلب کرلیا ہے۔ دونوں کو 26 جون کو طلب کیا گیا ہے۔ بشری بی بی کو 190ملین پاؤنڈ این سی اےاسکینڈل میں 26 جون کو طلب کیا گیا ہے۔