یوکرین کے علاقے لیمان پر روسی افواج کی گولہ باری سے آٹھ افراد ہلاک اور تیرہ زخمی ہوگئے۔

یوکرینی حکام کے مطابق روسی گولہ باری سے گھروں اور دکانوں کو نقصان پہنچا لیکن اس کے باوجود لیمان سیکٹر میں روسی فوج کی پیش قدمی ناکام بنا دی گئی۔ روسی فوج نے ڈونیٹسک کے دس قصبوں پر بھی گولہ باری کی۔

یاد رہے کہ روس اور یوکرین کی جنگ کو 500 روز سے زائد ہوچکے ہیں۔ اقوام متحدہ کا کہنا ہےکہ روس کے یوکرین پر حملے کے بعد سے اب تک ہونے والی لڑائی میں 9 ہزار سے زائد شہری جان سے ہاتھ دھو بیٹھے ہیں۔

دوسری طرف امریکا کی جانب سے یوکرین کو کلسٹر بم دینے کا اعلان بھی عالمی میڈیا کی زینب بنا ہوا ہے۔ امریکی اعلان پر انسانی حقوق کی تنظیموں نے کلسٹر بموں کا استعمال روکنے پر زور دیا ہے جبکہ روس نے یوکرین کو امریکی کلسٹر ہتھیاروں کی فراہمی کو امریکا کی کمزوری قرار دیا ہے۔