بھارت کیخلاف شاندار بولنگ کرنے والے شاہین آفریدی نے میچ کے بعد ٹوئٹ کرکے اپنے والدین کا شکریہ ادا کیا جبکہ کپتان بابر اعظم نے بولرز کی تعریف کی۔

پاکستان کی جانب سے شاہین شاہ آفریدی نے 35 رنز کے عوض 4 کھلاڑیوں کو آؤٹ کیا جبکہ نسیم شاہ اور حارث رؤف نے 3، 3 وکٹیں حاصل کیں۔

اس میچ میں پاکستانی فاسٹ بولرز نے تاریخ رقم کی۔ ایشیا کپ ون ڈے کی تاریخ میں پہلی بار فاسٹ بولرز نے مخالف ٹیم کی تمام وکٹیں اڑادیں۔

پاک بھارت میچ بے نتیجہ ختم ہوگیا لیکن شائقین نے سوشل میڈیا پر شاہین آفریدی کی تعریفوں کے پل باندھے۔

شاہین آفریدی نے بھی میچ کے بعد ٹوئٹ کی اور کہا کہ بے شک ساری تعریفیں اللہ پاک کیلئے ہیں۔

انہوں نے اپنے والدین کا شکریہ ادا کرتے ہوئے لکھا کہ ’تھینک یو امی ابو‘۔

دوسری جانب ٹیم کے کپتان بابر اعظم نے بھی بھارت کے خلاف میچ میں عمدہ بولنگ کرنے پر اپنے ٹوئٹ میں گیند بازوں کی تعریف کی۔

بابر اعظم کا کہنا تھا کہ بولرز کی اس طرح کی کارکردگی پوری ٹیم کے لئے اعتماد بڑھانے کا باعث ہے۔ شاہین شاہ آفریدی، حارث رؤف اور نسیم شاہ تمام تعریفوں کے مستحق ہیں۔