تھانہ گولڑہ کی حدود میں پولیس نے مشکوک کار کو رکنے کا اشارہ کیا گیا تو ملزموں نے فائرنگ کر دی، جوابی فائرنگ میں ایک ملزم زخمی ہوگیا جسے گرفتار کرلیا گیا۔

ترجمان اسلام آباد پولیس کے مطابق تھانہ گولڑہ کی حدود میں ای 12 میں ملزمان نے پولیس پارٹی پر فائرنگ کردی، تاہم کوئی جانی نقصان نہیں ہوا۔

ترجمان نے بتایا کہ پولیس پارٹی سیکٹر ای 12 میں گشت پر تھی کہ ایک مشکوک کار کو رکنے کا اشارہ کیا تو کار میں سوار 3 ملزمان نے پولیس پارٹی پر فائرنگ کر دی، کار بھگاتے ہوئے فرار ہوگئے۔ پولیس پارٹی حفاظتی تدابیر کی وجہ سے فائرنگ سے محفوظ رہی۔

ترجمان کے مطابق پولیس ٹیم نے ملزمان کا تعاقب کیا، اس دوران فائرنگ کا تبادلہ بھی ہوا، اور کچھ فاصلے پر ایک ملزم کو زخمی حالت میں گرفتار کرلیا گیا، جب کہ اس کے دو ساتھی موقع سے گاڑی چھوڑ کر فرار ہوگئے۔

ترجمان پولیس نے بتایا کہ زخمی ملزم کے قبضے سے اسلحہ و ایمونیشن برآمد ہوا ہے۔ جب کہ پولیس نے گاڑی بھی قبضہ میں لے لی جس سے گاڑی چوری کے آلات برآمد ہوئے۔

پولیس حکام نے بتایا کہ پولیس پارٹی پر فائرنگ کا مقدمہ تھانہ گولڑہ میں درج کرلیا گیا ہے، اور فرار ملزمان کی گرفتاری کے لئے چھاپے مارے جارہے ہیں۔ شہری کسی بھی مشکوک سرگرمی کی اطلاع پکار 15 یا ICT-15 ایپ کے ذریعے اسلام آباد پولیس کو دیں۔