نگراں وزیرِ اعظم انوار الحق نے فلسطین کے صدر محمود عباس سے ٹیلی فون پر رابطہ کیا، دونوں رہنماؤں نے فلسطین کی موجودہ صورتحال پر تبادلہ خیال کیا۔
نگران وزیرِ اعظم انوار الحق کا فلسطین کے صدر محمود عباس سے ٹیلیفونک رابطہ ہوا، جس میں غزہ اور مغربی کنارے میں اسرائیلی مظالم کے نتیجے میں پیدا ہونے والی صورتحال پر گفتگو کی گئی۔
نگراں وزیرِاعظم نے اسرائیلی قابض فوج کی بدترین بمباری کی مذمت کرتے ہوئے اسرائیل کی بمباری اور جارحیت کو قابل نفرت قرار دیا۔
انوار الحق کاکڑ نے الاہلی اسپتال پر اسرائیلی بمباری کی بھرپور الفاظ میں مزمت کی، اور غزہ کا اسرائیلی محاصرہ ختم کرنے کی ضرورت پر بھی زور دیا۔
نگراں وزیراعظم نے کہا کہ عالمی برادری بالخصوص اقوام متحدہ امن کے لیے فوری طور پر ٹھوس اور مؤثر اقدامات کرے۔
وزیر اعظم انوار الحق کاکڑ نے فلسطین کے معاملے پر پاکستان کی غیر متزلزل حمایت کا بھی اعادہ کیا جبکہ فلسطینی صدر محمود عباس نے فلسطینی عوام کی حمایت پر پاکستان کا شکریہ ادا کیا۔
