صدر عارف علوی کا فلسطینی ہم منصب سے ٹیلی فونک رابطہ، اسرائیلی حملوں کی مذمت
صدر مملکت عارف علوی نے فلسطینی صدر کو ٹیلی فون کرکے اسرائیلی مظالم کی مذمت کیا اور کہا کہ پاکستان مسئلے کے حل کیلئے فلسطین کی حمایت جاری رکھے گا۔
صدرمملکت عارف علوی نے فلسطین کے صدر محمود عباس سے ٹیلیفونک رابطہ کیا اور پاکستانی عوام اور حکومت کی جانب سے فلسطینی عوام سے ہمدردی کا اظہار کرتے ہوئے اسرائیل کی جانب سے مہلک بمباری، اسکولوں اور اسپتالوں کو نشانہ بنانے کی بھرپور مذمت کی۔
صدر عارف علوی کا کہنا تھا کہ غزہ کی صورتحال انتہائی تکلیف دہ ہے، اور پوری قوم اسرائیلی سیکیورٹی فورسز کی بربریت اور دہشتگردی پرغم ناک ہے، پاکستان اقوام متحدہ کی سلامتی کونسل کی متعلقہ قراردادوں کے مطابق مسئلہ فلسطین کے حل کیلئے فلسطین کی حمایت جاری رکھے گا۔
صدرمملکت نے کہا کہ عالمی برادری فوری جنگ بندی، غزہ تک انسانی ہمدردی کی بنیاد پر راہداری کھولنے کیلئے اقدامات کرے۔
مزید پڑھیں: غزہ میں بچوں کو قتل کرنے سے مزید حماس ارکان پیدا ہونگے، ایلون مسک
فلسطینی صدرمحمودعباس نے فلسطین کی حمایت اور انسانی امداد بھیجنے پر پاکستان کا شکریہ ادا کرتے ہوئے کہا کہ اسرائیل غزہ میں نسل کشی کر رہا ہے۔