کراچی میں بلدیہ ٹاؤن کے علاقے گلشن غازی میں ڈھلان کی وجہ سے گھر میں گھسنے والا واٹر ٹینکر ابھی تک ہٹایا نہ جاسکا۔ حادثے میں ایک شخص جاں بحق اور دو بچیوں سمیت چار افراد زخمی ہوگئے تھے۔ علاقہ مکینوں کا کہنا ہے حادثہ پانی کی قلت کی وجہ سے پیش آیا۔
پانی کی عدم دستیابی بلدیہ ٹاؤن میں سنگین حادثے کا باعث بن گئی، پانی نہ ہونے کی وجہ سے منگوایا گیا واٹر ٹینکر سامنے والے گھر میں جاگھسا۔
گھر میں انتالیس سالہ عامر سویا ہوا تھا جو نیند میں ہی جاں بحق ہوگیا۔ حادثے میں عامر کے بھائی اور بیوی سمیت دو بچیاں بھی زخمی ہوگئیں۔
اہل علاقہ نے بتایا کہ واقعہ صبح سویرے پیش آیا، حادثہ کے بعد ڈرائیور فرار ہوگیا۔
پولیس واقعہ کی تحقیق کر رہی ہے۔ تاہم ٹینکر ابھی تک جائے حادثہ سے نہیں نکالا جاسکا۔
علاقہ مکینوں کا کہنا ہے کہ پانی کی عدم فراہمی سب سے بڑا مسئلہ ہے۔
