میئر کراچی مرتضیٰ وہاب کا کہنا ہے کہ کے ایم سی ایک روپیہ بھی اکٹھا کرے گی تو وہ کراچی کے کام آئے گا۔

کراچی کے ڈینسو ہال میں پریس کانفرنس کرتے ہوئے مرتضیٰ وہاب نے کہا کہ اس وقت ہم لوگ کے ایم سی کی تاریخی عمارت میں موجود ہیں، ڈینسو ہال کا قیام 1886ء میں ہوا تھا۔

میئر کراچی نے کہا کہ کچھ فیصلے ہم نے کے ایم سی میں کیے ہیں، وسیم اختر کے آخری سال کے ایم سی کی آمدنی 1.2 ارب روپے سالانہ تھی۔ سال 2023 کے پہلے چھ ماہ میں 580 ملین کی آمدنی ہوئی، اگلے پانچ ماہ یکم جولائی سے 30 نومبر تک کے ایم سی کی آمدنی 1 ارب روپے ہوئی۔

میئر کراچی نے کہا کہ وسیم اختر کے زمانے میں ماہانہ اوسط 100 ملین آمدنی آرہی تھی، ہمارے دور میں ماہانہ آمدنی تقریباً 200 ملین ہوئی۔

مرتضیٰ وہاب نے کہا کہ 980 ملین روپے ہم نے اپنے ذرائع سے اکٹھے کیے، ہم ٹیکسیشن کے نظام کو بہتر بنائیں گے۔

مرتضیٰ وہاب نے کہا کہ پرامید ہیں اگلے چھ ماہ میں آمدنی میں مزید اضافہ کریں گے۔

ان کا کہنا تھا کہ کے ایم سی جو پیسہ اکٹھا کرے گی اس کا فیصلہ منتخب کمیٹی کرے گی۔