Aaj Logo

اپ ڈیٹ 01 جنوری 2024 05:37pm

شارجہ سے آنے والی خاتون کے جسم سے بندھے 23 آئی فون برآمد، مقدمہ درج

کراچی کے جناح انٹرنیشنل ایئرپورٹ پر بیرون ملک سے آنے والی خاتون مسافر سے ممکنہ طور پر 92 لاکھ روپے مالیت کے آئی فون برآمد ہوئے ہیں۔ کسٹمز ایکٹ کے تحت مقدمہ درج کرکے خاتون مسافر کو گرفتار کر لیا گیا۔

میڈیا رپورٹ کے مطابق کسٹمز بیان میں کہا گیا ہے کہ جناح انٹرنیشنل ایئرپورٹ پر کسٹمز کے اہلکاروں نے خاتون کو روکا۔ خاتون شارجہ سے ایئر عریبیہ کی پرواز سے کراچی پہنچی تھی۔

سامان اسکین کرنے سے معلوم ہوا کہ خاتون کے بیگز میں موبائل فونز کے خالی ڈبے اور گرافکس کارڈز موجود ہیں۔

حکام کے مطابق خاتون سے موبائل فونز کے خالی ڈبوں کے بارے میں پوچھ گچھ کی گئی تو وہ کسٹمز اہلکاروں کو مطمئن نہ کرسکی۔ لیڈی عملے نے تلاشی لی تو خاتون کے جسم پر بندھے 23 آئی فون 15 پرومیکس برآمد ہوئے۔

حکام کا کہنا ہے کہ برآمد شدہ موبائل فونز کسٹمز نے اپنی تحویل میں لے لیے، ان کی مالیت 92 لاکھ روپے ہے، جس پر 43 لاکھ روپے کے ڈیوٹی ٹیکسز عائد ہیں۔

حکام کے مطابق عدالت سے ریمانڈ حاصل کر کے خاتون سے مزید تفتیش کی جا رہی ہے۔

Read Comments