جمعیت علمائے اسلام کے سربراہ مولانا فضل الرحمان کی افغانستان سے واپسی پر اسلام آباد ائیرپورٹ پر بڑی تعداد میں کارکنان نے اپنے امیر کو خوش آمدید کہا تاہم مولانا کے خلاف نعرے لگانے پر کارکنان نے ایک نوجوان کو پکڑ لیا۔

مولانا فضل الرحمان دورہ افغانستان مکمل کرکے کابل سے اسلام آباد پہنچے۔ ایئر پورٹ پر بڑی تعداد میں کارکن جمع ہوگئے۔

جیسے ہی سربراہ جی یو آئی تشریف لائے تو کارکنان نے ان کے حق میں نعرے لگانے شروع کردیے۔ اور ان پر پھولوں کی پتیاں بھی نچھاور کی گئیں۔

میڈیا رپورٹ کے مطابق اس موقع پر ایک ناخوشگوار واقعہ بھی پیش آیا، اسلام آباد ائیرپورٹ پر چند نوجوانوں نے مولانا فضل الرحمان کے خلاف نعرے لگائے۔ جس کے بعد پارٹی کارکنان نے نعرے لگانے والے ایک نوجوان کوپکڑلیا اور باقی بھاگ گئے۔

واقعہ کے بعد رہنما جے یوآئی عبدالمجید ہزاروی کا کہنا تھا کہ جے یو آئی کارکنان نے معافی مانگنے پر نوجوان کو چھوڑ دیا۔