پاکستان ٹیلی ویژن کے معروف سینیئر اداکار طلعت حسین ان دنوں علیل ہیں، گزشتہ دنوں ان کی بیٹی تزین حسین کی جانب سےمداحوں سے دُعا کی درخواست کی گئی تھی۔

اس اطلاع کے بعد پاکستان کے مقبول اداکارفیصل قریشی نے اپنی فیملی کے ہمراہ لیجنڈری اداکارطلعت حسین سے ملاقات کی ہے۔

فیصل قریشی اوران کی اہلیہ ثناء فیصل نے اپنے انسٹاگرام اکاؤنٹ پرایک ویڈیو شیئر کی ہے جس میں طلعت حسین کے ساتھ گزارے گئے لمحات کو قید کیا گیا ہے۔

ویڈیو میں طلعت حسین کو مسکراتے ہوئے اور ان کے ساتھ گھلتے ملتے ہوئے بھی دیکھا جاسکتا ہے۔

پاکستان نے دنیا کے چند بہترین اداکار پیدا کیے ہیں۔ پاکستان میں پی ٹی وی کا دور اپنے بے مثال ٹیلنٹ کی وجہ سے سنہری دور کے طور پر جانا جاتا ہے۔

طلعت حسین کا شمار بھی پی ٹی وی کے ایسے اداکاروں میں ہوتا ہے جنہوں نے اپنی اداکاری سے دنیا بھر میں اعلیٰ مقام بنایا ہے۔

ایک نجی ٹی وی شو کے ذریعے طلعت حسین کی صاحبزادی تزین حسین نے والد کے اسکرین پر نہ آنے کی وجہ بتائی تھی۔ ان کا کہنا تھا کہ ان کے والد اب شدید علیل ہیں۔