عالمی شہرت یافتہ پاکستانی گلوکار و اداکار علی ظفر نے پاکستان سپر لیگ (پی ایس ایل) کے سیزن 9 کے آفیشل ترانے کا نام بتادیا۔

ہر سال کی طرح رواں سال بھی پی ایس ایل کا میلہ سجنے والا ہے جس میں چند دن باقی ہیں، پاکستان کرکٹ بورڈ کی جانب سے ایونٹ کی تیاریاں جاری ہیں جبکہ شائقین اس سیزن کے ترانے کا انتظار کررہے ہیں۔

پاکستانی گلوکار علی ظفر نے سماجی رابطے کی ویب سائٹ ایکس (ٹوئٹر) پر شائقین کرکٹ کے انتظار کو ختم کرتے ہوئے پی ایس ایل کے ترانے کے حوالے سے پوسٹ جاری کی ہے۔

علی ظفر نے پاکستان سُپر لیگ کے آفیشل ایکس اکاؤنٹ کی پوسٹ ری ٹوئٹ کی جس میں ترانے کی دُھن تھی اور ساتھ ہی پوسٹ پر لکھا تھا کہ ’جب مقابلہ ہو ٹکر کا تو کُھل کے کھیل“ْ۔

گلوکار نے اس پوسٹ کو ری ٹوئٹ کرتے ہوئے کہا کہ ”اس بار پی ایس ایل کا ترانہ کھیلنے اور بے خوف ہو کر جینے کے بارے میں ہے تو اسی لیے میں نے ”کُھل کے کھیل“ کے عنوان سے ترانہ لکھا ہے“۔

اُنہوں نے شائقین کرکٹ سے مخاطب ہوتے ہوئے مزید کہا کہ ”ڈانس کے لیے اپنے جوتے تیار کرلیں کیونکہ ترانہ بہت جلد آنے والا ہے“۔

یاد رہے کہ پی ایس ایل 9 کا آغاز 17 فروری سے لاہور میں ہوگا، ایونٹ کا پہلا میچ دفاعی چیمپئن لاہور قلندرز اور اسلام آباد یونائیٹڈ کے درمیان قذافی اسٹیڈیم میں کھیلا جائے گا، ٹورنامنٹ میں مجموعی طور پر 34 میچ کھیلے جائیں گے جبکہ پی ایس ایل کا فائنل 18 مارچ کو کراچی میں ہوگا۔