مقبوضہ جموں و کشمیر کے کٹھوا ریلوے اسٹیشن سے اتوار کی صبح ایک مال گاڑی ڈرائیور کے بغیر ہی چل پڑی۔ اور 84 کلومیٹر کا فاصلہ طے کیا۔
ہوا یہ کہ مال گاڑی کا ڈرائیور اور اس کا معاون دونوں ہی چائے پینے کے لیے کٹھوا ریلوے اسٹیشن کے پلیٹ فارم پر اترے۔ ڈرائیور انجن کا ہینڈ بریک لگانا بھول گیا۔
ابھی ڈرائیور اور اس کا معاون چائے پی رہے تھے کہ ٹرین چل پڑی۔ وہ دونوں بھاگے تاہم انجن کی رفتار علاقے کی ڈھلوان سطح کے باعث تیزی سے بڑھ گئی۔
ریلوے حکام کو مطلع کیا گیا۔ انہوں نے دیگر ریلوے اسٹیشنز پر حکام کو مطلع کیا۔ متعلقین کی دوڑیں لگ گئیں۔
مال گاڑی کو روکنے کی کوششیں پنجاب کی حدود میں رنگ لائیں۔ مال گاڑی کو مکھیریان ریلوے اسٹیشن کے نزدیک روکنے میں کامیابی ملی۔
