پاکستان پیپلز پارٹی کے رہنما ناصر حسین شاہ کا کہنا ہے کہ آج حق اور سچ کی فتح کا دن ہے، آج مختصر فیصلہ آیا ہے، اب تفصیلی فیصلہ آنے پر بات ہوگی، ذوالفقارعلی بھٹوکا جوڈیشل مرڈر کیا گیا تھا، فیصلہ فیئر ٹرائل تک محدود رکھنا مناسب نہیں۔

آج نیوز کے پروگرام ”روبرو“ میں گفتگو کرتے ہوئے ناصر حسین شاہ نے کہا کہ فیصلے سے شہید ذوالفقار بھٹو واپس نہیں آئیں گے لیکن فیصلہ آئندہ کی سمت طے کرے گا۔

صدارتی انتخابات کے حوالے سے ان کا کہنا تھا کہ آصف زرداری سب کے متفقہ امیدوار ہیں سندھ کابینہ میں کوئی اختلاف نہیں، صدر کے انتخاب کے بعد سندھ کابینہ حلف اٹھائے گی۔

پروگرام میں اظیار خیال کرتے ہوئے مسلگ لیگ (ن) کے رہنما خرم دستگیر کا کہنا تھا کہ جمعہ کووفاقی کابینہ حلف اٹھالے گی۔

نو مئی کے حوالے سے خرم دستگیر بولے کہ فارم 45 لہرانے والے پہلے سائفر لہرا رہے تھے، ان لوگوں نے 126 دن کا دھرنا دیا اور انتشار پھیلایا۔انہوں نے کہا کہ جوڈیشل کمیشن کا کہنا آسان ہے لیکن سامنا کرنا مشکل ہے، جوڈیشل کمیشن کا مطالبہ تاخیری حربہ ہے، بغیر ثبوت کے اس طرح کے مطالبے مناسب نہیں، ذمہ دار لوگوں کی ویڈیوز بھی موجود ہیں، اگر حملہ کرنے والوں کو سزا دیتے تو 9 مئی نہ ہوتا، ان الزامات کے پیچھے کوئی تعمیری ایجنڈا نہیں ہے۔

پروگرام میں گفتگو کرتے ہوئے پی ٹی آئی رہنما شعیب شاہین نے 9 مئی کی مذمت کی اور کہا کہ شفاف ٹرائل کا حق نہیں دیا جارہا ہے۔

انہوں نے کہا کہ ہماری تائید کرنے والے تمام بلاگرز ہمارےکارکن نہیں ہیں۔

انہوں نے مطالبہ کیا کہ دھاندلی کے حوالے سے جوڈیشل کمیشن بننا چاہئے۔

شعیب شاہین کا مزید کہنا تھا کہ الیکشن کمیشن جرائم کی آماجگاہ بن چکا ہے، فارم 45 میں 126 ووٹ کو 426 کردیا گیا، فارم 45 ویب سائٹ پر ڈال کر ہٹا بھی دیا گیا۔

انہوں نے کہا کہ مخصوص نشستیں کوئی خیرات نہیں جو بانٹ دیں۔

انہوں نے کہا کہ کیا بھٹو کی طرح ہم بھی 45 سال تک انتظار کریں؟