رمضان المبارک کا چاند دیکھنے کے لیے مرکزی رویت ہلال کمیٹی کا اجلاس طلب کرلیا ہے، رویت ہلال کمیٹی 11 مارچ کو پشاور میں چاند دیکھے گی۔

رویت ہلال کمیٹی کے چیئرمین عبدالخبیر آزاد 11 مارچ کو پشاور میں اجلاس کی قیادت کریں گے، اس دوران زونل کمیٹیوں کے اجلاس اپنے مقررہ علاقوں میں ہوں گے تاکہ چاند کی رویت کے حوالے سے رپورٹس اکٹھی کی جا سکیں۔

پاکستان میں رمضان المبارک کا مقدس مہینہ 12 مارچ سے شروع ہونے کا امکان ہے۔

اس سے قبل موسمیات کے تجزیہ کار جواد میمن نے بھی پیش گوئی کی تھی کہ ملک میں رمضان المبارک کا آغاز 12 مارچ سے ہوگا۔

جواد میمن نے کہا تھا کہ اگرچہ رمضان المبارک کا چاند 10 مارچ کو پیدا ہوگا، لیکن 11 مارچ تک اسے کھلی آنکھ سے دیکھا نہیں جاسکے گا۔

ان کا کہنا تھا کہ ’پہلی تراویح 11 مارچ کی رات کو ہوگی جبکہ پہلا روزہ 12 مارچ کو ہوگا‘۔